Vuaviri: PM

E vakadeitaka e Palimedi na noda Paraiminisita, Voreqe Bainimarama ni sa na oti vakadua na Viti e dau kilai tu ena vuaviri kei na tiko yavavala.

Oqori na veika e cauraka ena loma ni bose lawa ena siga Tusiti ena nodra vosa tiko na lewe ni Palimedi ena vosa a mai tauca na Peresitedi ni noda vanua o Joji Konrote ena kena dolavi vou na Palimedi ena siga Moniti.

E vosa tale tikoga o Bainimarama ni sa tu vakarau na nona matanitu ena kena maroroi vinaka na qele ni i Taukei.

E tukuna e Palimedi o Bainimarama ni sega ni dua na qele ni Taukei e bau yali mai ena gauna e veiliutaki tiko kina ka cibitaka ni ruku ga ni nona veiliutaki e yaco kina na veika oqo.

Ia ena nona vosa o Mosese Bulitavu mai na i To ni Veisaqa, vakaraitaka kina ni qele e ra kelia tiko na kabani ni kai Jaina me baleta na ‘ bauxite’ e sa lako vakadua ka sega ni qai vakaisosomitaki tale na qele era sa kau tiko vakayauyau koya.

E na nona vosa o Bainimarama a vakavinavinakataka na nodra sa lewe levu sara na marama era sa lewena na Bose Lawa ka vakadeitaka talega ni levu tale na veika me na vakayacori ena nodra vukei na marama ena buturara ni veiliutaki ena noda vanua.

E vakaraitaka o Bainimarama ni macala ni veidigidigi ena yabaki oqo e sa vakadeitaka na nodra ciqoma na lewenivanua na Yavu ni Vakavulewa e sa vakayagataki tiko ena gauna oqo.

E kuria ni dodonu me na kau laivi na veivakarerei e dau tiko vei ira na daunipolitiki.

More Stories