Na noda veidinadinati

NA dei kei na toso vinaka ni dua na ka, ena vakatau vakalevu ena kena yavu kei na kena muri vakadodonu na yavu oya. Na ka kece eda vakaitavitaki keda kina e dodonu me matata vakavinaka vei keda na kena yavu se inaki.

Ia na ka kece eda cakava, e dodonu me sota tiko vakavinaka kei na yavu se inaki e virikotori vata kaya.

Eda sa vakananumi tiko vakavuqa ni vakawati e duatani e vakavuna, e tiko vata na kena yavu kei nai naki.

Ia sa tiko nai tavi ni tagane kei na yalewa vakawati me vakadeitaki kina na vakawati ka me veisotari kei na yavu kei nai naki taumada ni vakawati.

E na macawa rua oqo au na tara tiko yani kina e rua nai vakarau ni bula e dodonu vei rau na veiwatini me rau bulataka me rawa ni vakadeitaki kina nodrau vakawati.

A kenai matai sai koya na veidinadinati ka kenai karua na loloma. Au sa na tekivu ena macawa oqo ena veidinadinati.

E dua nai wase levu sara vei keda e a tekivu na noda bula vakawati e na veiyalayalati ena siga ni vakamau, aya na kena vakamatanitu ka qai muria na kena vakalotu, se vakamatanitu ga.

Ke lako vata na kena e vakamatanitu kei na kena e vakalotu se sega, eda rawa ni raitayaloyalotaka lesu na noda dui gagadre kei na noda dui vakanuinui ni bula vakawati eda a mai curuma, eda namaka taucoko ni da na mai sotava kina kei na kedai sa eda sa digitaka na bula marau kei na bula vakacegu.

Ia eda sa qai mai liaca e muri ni bula marau kei na vakacegu e rogorogo rawarawa ni se bera ni da vakawati, ia ni sa mai yabaki vica na tiko, eda qai liaca ni marau kei na vakacegu e sega ni kunei vakarawarawa e na loma ni vakawati.

Ena kunei dina na marau kei na vakacegu, ia kevaka ga e muri donu tiko nai vakarau ni bula ka ra davo vata koto kei na yavu ni bula vakawati vinaka.

Eda a tatadrataka mai nai matai ni gauna ni o koya e na mai watida, eda na sokota vata na wasawasa ni bula, e na mai tokoni keda, salavata kei keda me vakaukauwataki keda ka vakadeitaki keda e nai lakolako balavu ni bula vakawati.

E sega ni dua vei keda e yavutaki nona vakawati e na vakanananu me mai kavoro.

Eda a vosa yalayala me da maroroya ka karona na bula ni watida, veitalia se draki cava ga eda na curuma.

E sega ni dua tale ga vei keda e koto mai daku ni nona vakanananu e na gauna e tauca tiko kina nona vosa ni yalayala, ni na mai biuti watina

Na veidinadinati ni tagane kei na yalewa e na loma ni vakawati e tekivutaki sara ga ena kena a buli na vakawati e na were ko Iteni.

Oqo na kena vosa: “O koya oqo sa na biuta kina na tamana kei tinana na tagane ka kabita na watina” (Vktkv. 2:24).

Na tiki ni Vola Tabu oqo e dusia koto ni veidinadinati e tara tiko na bibi ni digidigi, ia na digidigi oqori e sega ni ka rawarawa ka ni vakawati e taura na bula taucoko ka sega ni ka ga ni gauna eda vinakati watida kina.

Ni oti na vakamau, sa kenai balebale ni ko sa vakatulewa mo vakatikitikitaka se vakacagicagitaka tani e so na ka ka dau talei vei iko e liu.

Na nomu vakatulewa oya, ko sa vakatauca e na nomu vakadabera vakamalua na nomu digidigi me baleti koya sa bibi vei iko.

Ena siga ni vakamau, eda sa kacivi meda tu vakarau me da digitaka vakamatau na veika e bibi ka talei ki na noda bula vakawati ka kauti keda vakavoleka vua na watida eda veiyalayalati kaya.

Na tikina bibi ni veiyalayalati oqori na noda soli keda me da kabita tiko na watida e na gauna ca kei na gauna vinaka, ni da marau se rarawa, vutuniyau se dravudravua, se da tauvimate se bula vinaka.

E na vakadeitaki na veiyalayalati oqori e na dela ni veidinadinati, ka da sa vakatulewa me da laiva se biuta na tamada kei na tinada ka me da sa dinata sara na watida.

A ya nai balebale ni “biuta” kei na “kabita.”

E na yaco taumada na biu, sa na qai rawa na kabi.

Ko ira na nodai tubutubu era na nodai tubutubu tiko ga, ia e na vakasama ni veivolekati, sa ka bibi mo vakavolekati iko sara vua na watimu.

Kevaka ko na via kabi tiko ga vei rau nomui tubutubu e na dredre ni ko kabiti watimu.

O keda talega nai tubutubu me da sereki ira na luveda ka qai vukei ira ga vagauna, qarauna meda kua ni lai vakatulewa vei ira ka ni sa oti nomu gauna ni vakatulewa baleti ira.

Sai sere ni nomu kaukauwa ni vakatulewa na veiyalayalati ni vakamau erau sa bukia na luvemu kei na watina.

Kakua tale ni vakasaga e levu na ka mo vakalatilati se vakaosota nodrau gaunisala ni sasaga bula na gone.

Sa nodai tavi dodonu sara na qase na noda kauti ira mai na luveda ki vuravura, da mai susugi ira ka vakarautaki ira sara vakavinaka e na nodra tubu me ra vuli, cakacaka ka vakawati sara.

Ni sa yaco ki keya, me da sa sereka na dali ni veivauci vakaitubutubu me rau soko galala na gone.

Na veidinadinati ni vakawati e koto ena vakasama ni duabau.

A ya ni rau sa sega tale ni qai lewe rua tiko na tagane kei na yalewa vakawati, ia e rau sa duabau ga.

Me vaka ga au sa dau cavuta oti tiko mai vakavuqa na vosa vaka-Iperiu ni “kabita” e davo vata koto na vakasama ni drega (glue) ni kau se pepa, ka rau mai dregati qaqata kina e rua na bula duidui me sa duabau ga.

Na nodrau mai duabau oqo, me sa ka sara ga e rau dui vakatulewataka se digitaka me rau cakava. Me kakua ni caka ni voraki se me vaka e caka tu ga vakasakasaka, ia sa dua na ka me sa lomadrau ruarua kina.

Na veidinadinati e ka ni rua na tai.

Ia kevaka e dina tiko e dua ka sega ni dina ko koya kadua, oya e sega ni dua na veidinadinati.

Dina ni tiki ni bula ni tamata na druka kei na malumalumu, erau sa bolei tiko na tagane kei na yalewa me rau vakadeitaka tiko ena veigauna kecega na nodrau veidinadinati ena kena yacovi na yalayala e rau vauci rau kina.

Na veidinadinati ni vakawati ni oti na vakamau, erau sa mai bolei talega kina na tagane kei na yalewa, me rau biuta vakatikitiki e so se vuqa na ka talei ka tiki tu ni nodrau bula e liu me vaka na lako vakailawalawa, na nanumi koya ga vakaikoya e na nona vakamarautaki koya e na sala e vakayagataka kina nona gauna kei na nonai yau kei na nonai vakarau ni vakasama ka dau vakabibitaka kina na veika me baleti koya ga.

Me vaka ga na nodrau sa vakasiroi nai tubutubu mai na nodrau kabita na luvedrau, me sa sere tale ga na dali e na veivesuki ni bula vakacauravou kei na bula vagoneyalewa kei na veidraki ni bula ka dau salavata..

E dodonu me matata tiko vua e dua na cauravou kei na dua na goneyalewa, ni gauna e rau mai vakamau se vakawati kina, ko watina e sega ni tamana se tinana ka me kakua sara ni namaka ni na vakakina.

E sega, ko watimu e sega ni nomu Ta se Na me solia ka cakava kece ga vei iko na ka ko vinakata.

O drau sa dui biuta mai nomudrau vale kei na nomudrau veisemati makawa ki na tamata kei na ka buli kecega.

O drau mai duavata e loma, ia e lala tu.

E loma oqori mo drau qai viria cake kina e dua na bula, io na bula oqori e vua sara ga ni veika drau na dui soli kemudrau kina.

Na veidinadinati sa ka ni soli bula – na nomu soli iko taucoko vua na watimu, io me baleti watimu.

O sega ni lako mai loma qo mo mai daumaka ga o iko ka veitalia ko watimu.

Na nomudrau vakawati sa ka mo drau cakacakataka vata na kena vakabulai kei na kena vakadeitaki.

Na vakawati, me vaka au raica, sa vaka na buli se tarai cake na nona bula e dua na gone.

Daru dui biubiu mai ka daru mai vakadaberi e loma me daru susuga ka maroroya na gone oqo. Na nona bula vinaka se tauvimate na gone oqo e tiko sara ga e na ligadaru.

Nodaru gone ?qo e na sega ni tautauvata kei ira na gone tale e so. Me vaka ga ni duidui kece nai solisoli kei na kila e tu vei keda na tamata, vakabibi vei keda nai tubutubu yadua, e na dua tani tale ga nodaru gone.

Na veidinadinati sa ka e daru sa duavata kina me daru vakabula na gone ka daru dui soli kedaru sara vua e na nodaru okata ni sa bibi duadua ga ko koya.

Ia e rawa tale ga ni daru kidomoka ka vakamatea na gone qo. Oqori e vakatau tiko ga vei kedaru.

Sa ka ni rarawa dina ni levu sara vei keda sa mai kidomoka koso nodra gone (vakawati) baleta ga ni sega ni ra soli ira taucoko sara ki na nodra yasa ni veidinadinati.

Ia e talei, ni iwase levu duadua ni tagane kei na yalewa vakawati era sa vakadeitaka oti e yalodra kei na lomadra ni ra na sega ni muria na sala oya.

Ke mani vakaevei na dredre ni bula kei na veisau ni gauna, era sa digitaka ka vakatulewa oti me ra maroroya nodra veidinadinati.

Au sa na mai yala tale toka mada e ke ka me’u qai tomana yani e na macawa ka tu mai.

Ena qai tomani tale yani.

More Stories