Dredre dina na veitaratara

NI DA curuma yani na loma ni noda vanua e Viti Levu, e na colo ni vanua ko Naitasiri kei Namosi, eda na qai la’ki vakadinadinataka e kea na dredre era sotava tiko na wekada ka tiko mai kina na nodra koro.

E dua na kena i vakaraitaki e a la’ki sotava na Na i Lalakai e na i golegole ki na koro ko Nakavika, mai na colo kei Namosi, sa i koya na dredre ni veitaratara e na talevoni veikauyaki.

A vakaraitaka mai o Elia Atunaisa ni nodratou koro e rawa ni katia ga kina na talevoni ka dodo yani kina na wa (land line), ia ni sa sega e rawa ga ni qai katia kina na Digicel.

Tomana na nona i talanoa ni sa dua ga na vanua ni qiri era na mai tu kina qai katia na talevoni.

Kevaka o via qiri mai ki Suva se na yasai Viti cava tale, mo lako sara e na vanua oya, e na maliwa ni rua na vuni niu, e na qai rawa ni laki katia kina na nomu qiri.

Ni da raica na vanua o ya e sega ni bau tubu kina e dua na co, e na levu ni tamata era dau la’ki qiri tiko kina.

“E kalougata ga ni toka e na neitou yasa ni koro, ka sega ni taubaletaki sara vakabalavu me vaka e so na koro e na veiyasai Viti.

“Dau vakaloloma ni bogi levu batabata, keimami na dau la’ki vosota tu, me caka gona vakacava, ni sega tale ni dua na vanua e na katia kina na talevoni ni Digicel,” kaya o Atunaisa.

Kuria e na nona i talanoa ko Atunaisa ni so na gauna era vinakata na ivola mata (face book), era na lako ga e na vanua o ya.

Sa kerekere raraba tu ga o Atunaisa ki vei iratou na tabana ni Digicel kei na Vodafone ke rawa ni ratou la’ki vakaduria na nodratou walesi e na delana e volekata tiko na nodratou koro.

Tinia ke rawa ni ratou raica talega na matanitu na FijiFirst na nodra tagi na wekada era tiko mai na colo ni vanua o Viti Levu.

More Stories